Wolte sie nur/ wie sie solte;/
und solt' ich nur/ wie ich wolte/
So wer' ich und sie vergnuegt./
Ach! wie wer' es wol gefuegt/
wenn wir nicht so wiederstrebten/
sondern itzt und fuer und fuer/
Ich bey ihr/ und sie bey mir/
in verglichner Liebe lebten./
O wie wuerden unsre Heerden/
so geschwinde feister werden!/
Feld/ und Thal/ und Berg/ und Heyn/
wuerde mit uns froelich seyn./
Alle Nymfen wuerden lachen/
und uns manchen schoenen Tantz/
manchen schoenen lieben Krantz/
in den bunten Wiesen machen./
Ich auch wuerd auff meiner Pfeiffen/
ein erfreutes Liedlein greiffen/
wenn ich in der Liebsten Schoss/
alles Kummers wuerde loss./
Denn wolt' ich an stat dess Klagen/
das mich itzt fuer seiner Pein/
kaum laesst mich und meine seyn/
nur von lauter Wonne sagen./
O du schoene Salibene!/
Salibene/ O du schoene!/
Schau doch/ wie sich alles liebt/
und in suessen Freuden uebt./
Alles wird durch Lust geruehret./
Wir nur goennen unsre Zeit/
der verstossnen Einsamkeit./
Denck' ob diss sich auch gebuehret.